Helbest

84 xwendin.

Rênas Jiyan - Min Ji Te Hez Kir
ji bo bejna min ne dirêjtir an jî kintir e,
ji bo rengê canê min ne boztir an jî esmertir e,
ji bo çevên min ne mezintir, an jî bêvila min ne biçûktir e,
min bi xwe û xwedê re şerr kir min xwedê bêminnet kir
min ji te hez kir
ez bûm yekî kafìr...
/
min ji te hez kir
mirina ku gav û seat di bîra min de bû,
û hundirê min bi qeramûçkên xwe kort dikir
ji bîr kir,
min dilê xwe li mirinê rehet kir,
min çi xweş kir
min ji te hez kir
ez bûm yekî nemir...
/
min ji te hez kir
fîlmê nû yê tarantîno kîjan bû
messî çend gol avêtibû?
barcelona dîsa şanpîyon bû
îsal baran baş barîya bû, nebarîyabû
"dîbê" li zadan xistibû giş hişk kiribû
min ji te hez kir
êdî min hew tiştek meraq kir...
/
min ji te hez kir
çima hinekan ji bo malê dinyê, xwe li her hinakan xûz dikir?
çima hinekan hinek pîs û xwe paye dikir
çima hinekan ji bo desthilatdarîya xwe her tişt
qirr dikir?
çima wî patronî heqaret li wî karkerê bêguneh dikir, jinika li ser billboardê reklama çi dikir, çi hewce dikir?
mêrikê li ser televîzyonê qala çi dikir?
ez di kû de mabûm, min çi xwendin dikir ?
min ji te hez kir
êdî min hew ji tiştekî fam kir...
/
min ji te hez kir
min bi kûçikên nîvê şevê re tûletî kir
min bi çivîkên destê sibê re gellacî kir
min pê li ciyê herî şil kir
min dilê xwe "bivvve" kir
ez bûm kawikek û min ji her derewê bawer kir
min ûcaxê xwe kor kir,
deriyê mala xwe mohr kir
min ji te hez kir
min ruhê xwe talan kir...
/
min ji te hez kir
min karê xwe yê berê wenda kir
min wek karekî nû dest bi te kir
min bêrîka xwe birîn kir
min mirina xwe har û dîn kir
min xwedayê xwe kedî kir
min ji ber xeyalên xwe yên tisî û xav fedî kir
min xwe ji jîyanê bi şîr vekir
min ji te hez kir
min xela li emrê xwe rakir...
/
min ji te hez kir
çîrokan bê xatirxwestin ji cîrantîya min bar kir
min li hemberî bedewiya baranan serî rakir
min ji bo ku destên te neqefilîne bayê kur bertîl kir
min kenekî nû ji xwe re kirê kir
min xwe di nav xelkê de nav-no kir
min li benda te xwe spî kir,
şîva xwe sar kir,
xwîna xwe zilindar kir,
min ji acîzi çîrçîrî kir,
xwe bi tenetîyeke pirr bi talûke hûrhûrî kir
min ji te hez kir
min mala xwe xera kir.

*ji pirtûka "Dîn û Şîn"

Şîrove

Ka tu şîroveyeke giranbuha li vê helbestê nakî?

Ji kerema xwe re dîsa biceribîne..

Helbestên din ên Helbestvanî/ê

34 Gulle
Aştî
Berf
Berî Hûn Min Daliqînin
Bigirî Hibra Pênûsa Min Bigirî
Çalakî
Dê û Law
Ey Pakrewan
Hebhinarkê
Herba Kobanê
Janya
Kerem Bike
Kok (Tên)
Koleksiyon 1
Koleksiyon 10
Koleksiyon 12
Koleksiyon 13
Koleksiyon 14
Koleksiyon 15
Koleksiyon 16
Koleksiyon 19
Koleksiyon 2
Koleksiyon 20
Koleksiyon 21
Koleksiyon 3
Koleksiyon 5
Koleksiyon 7
Koleksiyon 8
Koleksiyon 9
Kolleksiyon 11
Kolleksiyon 17
Kolleksiyon 18
Kolleksiyon 22
Kolleksiyon 4
Kolleksiyon 6
Kul 1 (Bê)
Kul 2 (Stêrka Bêçirûsk)
Kul 3
Kul û Kulîlk
Li Herî Jorîn Firîna Bêbask
Lîse
Ne Tu
Qesîda Qedexe
Semîramîs
Sirûda Kurdistanê
Strana Bajarê Bê Hîs
Taybet
Tu Neyê Ez ê Bimirim