Omer Farûq Ersoz - Duayê Nêçarekî

Vile hîkmet’ çi kena a seyîr keno şaşa
Wek-wek gino piri heq, keweno şik haşa
Herr’ kenen û keno xo sare sê yew hermuş a
Xelq to ra, goşareyê guneyî ho mi goş a

Destan qeza û qeder a şuyeno nat û wet
Celqeye teqdîr yeno mi ser sê laser her het
Boçan şeytan rî taşen, nêken ar û şîret
Kerdeyê xo û heq’ nimneno nêgeno îbret

Hiş û aqil mi de esto, kêmaqil zî nîyo
Dîn’ ma gore zîyiş xo de bargune nêzîyo
Her ganî, ayet gore, hukmê Heq’ rî tabî yo
Hukmê to bexş sera-bin sê bînen ey rabîyo

Musay însan kişt, rema şi, to kerdo kelim
îbrahîm ver tada tîj û aşm’, to vato helîm
Zaf şaqî bîy seîd, xidar to kerdo selîm
Ez nêzano ça ra çi cis dest pêkîrî telîm

Eki ti vajî to ra weş o, bêr benî a heq
To kî ferman nêda rijîyen mi ser bêr xêr-heq
Qûl xo dicey a di felqe meşeq û mefeteq
Mi sare wedarna asmînan ûneno maleq

Vanî dest’ to akerde yî, bêhed kenî vila
Kam tarîye de bimano fînenî ta çila
Kam bivajo Heq, to eşnawen weşîye dila
Biwazyenî vanî, to vawa dua qawil a

Dua kî mi kerda, calbik areq a mendo
To bî Homa, ez bîyo qûl helyo nêmendo
Keremê xo ra vaje bes o, xêrî ser bivendo
To ser a sond ûnen to zanî mi çi sond wendo

Sond’ to yo ya Rebî, sond’ xo xenîme mi mekir
Virr mi wa mequre, to rê sond serkopî dekir
Bêr kî to qeflîk kerdî, tadayîşe bifikir
Bo! Hewaye bêhevîye ez kerdo ri-çiqir

Qarîye xo birnen, keno qêlaqup nequzen
Teqdîr karê to yo sê lîre mirçîk’ nêwizen
Hîkmet senî şuxulyeno zerarê xo qet nêwazen
Defterê to ya ez xo şaşa “bi razî” nêsen

Nameyê to çi nîsyen defter mi de zanî to!
Nêeşken xorîye aşûnî, ez xo ra weto
Mi yew rê berê to kuwa, nêhes, muşeqeto
Ey Qadîr! Eceba to gîrê da çi nîyeto*
_____________

*Newepel, Hûmare 35, r. 4