Zulkuf Kişanak - Vengo Pîl

Cor de
Nê koyî ser o,
Verara Koyê Mewlî de
Demenan ra Xidê Memkî
Eşt adirî miyan leşkeran
Leşkerê tirkoyî
Gan û beden biy têtewr
Veşay

A roje
Tersî ra temamê asterikan û rojî xo ma ra nimit
û şiy
Tarî kewt asmênî

Erê
O wext zî
Bêveng mend no Pîlveng, vengo pîl
Wexto ke Demenan kewt
Tirkan dest da nê koyan ser
Dest na nê newalan ser
Bira

Dereyê Laçî
û çimeyê Halborî ra nat a û wet a
Se ke mi vat, ciniyan pa domanan a
Xo eştê Munzurî miyan, sey qiyamêtî
Wexto ke Yûsifan, Qoçan
û şêx Hesenan zî kerd el-aman
û tirkî tiya ra
Na newala pîroze ra ravêrdî, veracor
Vera Pulemûriye
û Koyê Munzur Bavayî

Se ke vanê
Vengê Xidê Memkî nêkewto cêr, asmênî ra
Hêna hetê çime û Koyê Mewlî ra yeno,
Wexto ke kes goşê xo dano Heqî
û Munzur Bavayî
Qîrî kewna goşan, qîriya Xidê Memkî
Pîlvengî ra tepiya
Borgînî û hetê Demenan ra nat a

A roje
Roja ke pêro camêrdî
Qelenderî
Ganfîday
şerwanî
û Seyid Rizayo kurd
Halborî de amey pêser
Nê kerrey
Kerreyê ke terteleyê Dêrsimî ra sêkur mendî
Xo hêl kerdî a roje
A roja ke roj sewbîna akewt
Sanikî sewbîna ameyî nuştiş
ûşewqê xo da tarîxî
Delalê
û delala çimrengîne, eşqa girde
Tîja mi

Werze
Werze Histûna şayî
û Pîrê Sêvdînî, de werze berey o
Bewnî na qîriye ra
Qîriya nê ciniyan, nê çênekanê Irganî
û Xidê Memkî ra

Qîrî û hawarê adirî rê,
Adiro ke perra ganê kurdan, zerriya Dêrsimî
Hetê çemê Munzurî ra
Heta ke reseno Xozatî, Qoçan, Alî Bogazî
û Wareyê Sosinî

Hawar
Hawar sereyê Elî şêrî rê, sereyê embazê Zerîfa Xanime rê
û sereyê şahan Axayê ma rê,
Qîrî û zîzikkerdena ciniyanê eşîra Yûsifan rê
Pêroyê kurdan rê