Zulkuf Kişanak - Vilika Vewrî

Ti halîn a
Koyo çetin, koyo berz
Axîwor
Adirê zerriya mi rê, zerriya înan rê
û zerriya rojî rê

Xan Mehmûd
Embazê Mîr Bedirxanî û Nûrullah Begê Culemêrgî yo
Kelengêh de, keleha beg û paşan de ronişt
Hetê Zerîkasî de
A roje
Wexto ke xebera kewtena Mîrê Botanî ameye
û mûsa ke celadî; paşayê Osmaniyan sere cikenê
Reşkotan de, Deştê Mişarî de
û Dihê de
Adir kewt zerriya Xanî
Hewnê ey rema
Sirgunê ûlûcika Bulxaran kewt ey vîrî
û o şefeq
O şefeqo xerîb de mend bêsolix
Xan Mehmûdê ma

Wax to rê Xan Mehmûd, wax şima rê Kawaş, Mikis
û wax Nordiz, Sunduz, pêro warey, koyî
û Geliyê Karkarî
şikefta Sê-Derî, çimeyê Etamagî
Roj beno tarî û tenik
Na dewa weşe, dewa xaseke; Arpêt
Winî rindek abena ke menga adare û gulane de
Ti vanê qey koma vilikanê vewrî ya, hende pak a
Ke qet mevaje
û kaleka xo dana Koyê Axîworî
Bêxem

Cêr de
Deşta Kawaşî ra pey
Beriqiyeno Behrê Wanî, sey hewtrenge
û sey çimanê to
Delalê

û delala çimrengîne, eşqa girde
Tîja mi

Wexto ke keyey dayî adirî ver, leşkeran
Qîjî kewte zerecan
Moz û mîlçikan ser
Tutî lerzay tersê nê teresan ra
Astorî verê xo da koyan, kutikî zî da Poxnisî
Dewa cerdewanan; dewa xayinan

Adil Beg
Bego ke îsmet Paşayê tirkan sereyê ey waştêne, ka
Ka, de vaje halînê qelenderan, halînê şerwanan
Koyê Axîworî, Dereyê Kûturî zî nêşka bibo wayir
Sereyê Adîl Begê Miksî rê û begê bêminetî rê
Erê
Erê Rasim Begê Kawaşî
Bêbextî bar o, barêko giran o
Hende giran o, ke heta mergî milan ra nêkewno
Sey şewa tariye
û tersê hewnî, her tim dorûverî tepşeno

Tew
Tew îsmet Paşayê tirkan rê, kerwayê Rasîm Begî rê
Tew, tew mîrê fîtnebazan rê

Qet qalî meke
çend arminî kişyay nê newalan de
Nê koy û kereyan miyan de, qet qalî meke
Hêna veng yeno, vengê bermî, bermiyê domanan
û kokiman

Qet qalî meke
Ne ez eşkena pers bikera, ne zî ti eşkenî vajî
şahido bêveng
Kerr, kor û lalê ma hemînan, Axîwor
Axîwor

Dima ra
Amed, Dêrsim, Qamişlo, Ranya, Urmiye
û çar hetê Kurdistanî ra
çar hetê dinya ra amey ciwanî, kewtî nê welatî
Kewtî milê to, xo eşt bextê to
Geliyê Karkarî
û axîna Xerzanî
To se kerd
û ka ê ciwanî, ê cinî û camêrdî
Wax to rê, wax na bêvengiya to rê, wax
Wax Axîwor
Axîwor